أسباب الحياة السعيدة !!!

يا صاحبي لا صرت ضايق ومهموم

ابحث عن اسباب الحيـــاة السعيدة

حرر قيود الامــــس وابدا من اليوم

افتح علـــــى دنياك صفـــحة جديده

دايـــــم تفائل بالأمل واترك اللوم

عش لحظتك واللــــي مضى لا تعيده

اعرف ترى منته من الذنب معصوم

اللـــــه هـــــو الغفـــــار وحنا عبيده

ان شانت الدنيا ترى العمر مقسوم

محدن حياته جاءت علـــــى ما يريده

الحـــــزن مهما طــــال لا يمكن يدوم

بعض التجارب فـــــي حياتك تفيدة

وان كنت مـــن عذبات الايام محروم

منت الوحيـــد اللـــــي ظروفه عنيدة

ما دمت لا ظـــــالم ولانت بمظلوم

وقلبـــــك بعد لازال ينـبــــض وريده

انفض غبار الهم واصحى من النوم

اصبر علــــى الشدات لوهي شديده

عانق تباشيـــــر الزمن وابعد الحوم

قدامـــــك دروب الامـــــانـــي عديده

لا تشتكي للناس لو كنت مطعون

 والذم من بعض الخلائق مديحة

ولا تنحني للهم وتعيش مغبون

المستريح أهل العقول الصحيحة

لا صرت صادق قالوا الناس مجنون 

ما يمدحون إلا النفوس القبيحة

وخلك صمود بوجه الأيام موزون

وما حرم الله إثم لا تستبيحه

والكبر لو به فايدة فاد فرعون

ومن ذاع سره بشّره بالفضيحة

والله لو يعطون لك مال قارون

 ما شفت نفسك بالغنى مستريحة

انفض هموم القلب وإبليس ملعون

 دنياك ما تسوى وخذها نصيحة

لو كانوا أصحابك يضاهون مليون

 نَقْ الوفي منهم وخل النطيحة